diumenge, de febrer 12, 2006

Qui fuese gurrión


Madrid no ye un buen puesto an que pasar tristuras. Feba sol y no caleba o chambergo ta sallir de casa, pero me yeba igual, tampó no teniba ixa intenzión. A cabeza ye una mala compañera, mes que mes cuan tiens que fer-la treballar en atros asuntos mes probeitosos que os que te i rondan y se negan a marchar-ne. Ya se m'enboiraban las letras, tota la tardi pasán pachinas ta deban y ta zaga, ta deban y ta zaga y cuan zarras o libro, torna a comenzar, pero güe no yeba un dia que me fese guaire goi saber de que color pariba os crabitos una craba roya eterozigotica chuntada con un buco negro omozigotico, güe no teniba dengún intrés per Mendel y los suyos bisaltos, ixe monche aburriu con muito tiempo que perder. Se m'ha perdiu a mirada entre os tellaus que teniba debán, asta que he descubriu tres gurrions encorrén una gurriona, plega la calor y chunto a ella l'amor. Qui fuese gurrión, pensaba cuan uno baixaba ta'l suelo a minchar un piazet de pan que se l'eba cayiu a un zagalet, sin mes preocupazións en a bida que trobar ixa molleta que atros pierden. He debantau un poquet la mirada y he leyiu en a paret "Nazis Muertos", puestar que este llugar no sía tan dolén como el pintan, me diba con una sonriseta en a boca. Farto de mirar per la finestra, he posau mosica un ratet ta fuyir unos menutos d'a reyalidat, chitau en a cama y fumán sin ganas, pero en o techo se dibuixaban cosas que no queriba beyer. ¿Tantisma mosica que tiengo y no ñai una canta que m'alegre el dia? Cuan m'he dau cuenta, ya s'eban enchegau las farolas y o zielo s'eba tornau fosco, en fin, ya está tot feit, que sía o que Dios quiera. Ora de zenar y de mirar un ratet internet. Per suerte he sentiu o programa de Sputnik y m'ha posau ben contento. Grazias ninos, continaz con ixo perque fez una fayena buenisma.
Pues ixo, que pel maitino tornará a sallir el sol. Bah, barucas mias, dixaz-lo estar, me'n boi a chitar que a las 9 tiengo un desamen.
ASCUITÁN: Three little birds de Bob Marley

2 Comments:

Anonymous Anònim said...

Dios, como disfruto leyendote, que sensibilidad. Poeta!! gracias por alegrarme el día.
Entabán mesache.

13/2/06 7:10 p. m.  
Anonymous Sputnik said...

Me fa muito goyo cómo esplicas un diya, cómo fas d'o cutiano una cosa espezial, encara que sigan desamens... Y ixe gurrión no ye un atra cosa que a bida pasando debán d'os güellos: ilusions, motibos, desenganyos,...

M'ilusiona que dende a mia insignificanzia t'aiga alegrau una mica o diya, encara que me cuacaría que sabeses que leyer as tuyas parolas tamién me fan sonredir y dan motibos ta continar entadebán con Sputnik.

Salut y aspero que iste seiga o primero de muitos comentarios más. Más que más si continas escribindo en ista linia.

13/2/06 11:00 p. m.  

Publica un comentari a l'entrada

<< Home