dimarts, de febrer 07, 2006

O tresoro amagau


Eban las fiestas d'o llugar y ñaeba un conzierto en a carpa que paraban as peñas cuan me'n ba sallir ta l'escampau de fora perque me pichaba y ya no'n podeba mes. Se ba amanar an que yo pichaba un ome medio zorrizo que fumaba un puro y caminaba como podeba.
No se per qué me ba sallir ixo, pero le ba dir: -Para cuenta no trepuzes, que encara t'espaldarás con ixe branquil.
L'ome no se ba estrañar brenca del que ba sentir y me ba contestar: -Encara me tiengo tieso, zagal.
Y astí ba ser, pichán entre coches y cañapitas, an ba conozer a ixe buen ome. Resulta que yeba un maziello d'unos 50 años, de Salas Altas, que eba beniu de fiesta al llugar mio. Cuan bels amigos ban sallir a buscar-me, me ban trobar-ie charrán rarizo con un ome que no eban bisto mai y tronzán-me de risa con as anecdotas y las istorias que me contaba. Ixa charradeta ba ser una d'as mes sucosas que he teniu mai en aragonés y sobre l'aragonés. Me ba explicar como charraban n'o llugar suyo y como bariaba l'aragonés en atros puestos, como se perdeba la luenga y como caleba reconozer-la y proteger-la. Me diba como en Salas Altas ya només charraban aragonés os grans y que os ninons no sabeban charrar-lo.
Lastima que no me'n acorde de mes cosetas, l'alcol y la memoria no fan buenas migas, pero me ba pasar media nit charrán en aragonés con él, que amás amás emplegaba un aragonés riquismo, talmén perque iba zorro como un canasto y no se cortaba ni s'abergoñaba miaja a l'ora de charrar con yo.
L'aragonés ye un tresoro amagau, només cal trobarlo.

2 Comments:

Anonymous O chicote ro Molino said...

Poca chen queda de Salas Altas que sepamos charrar en aragonés, pero sí que tiengo l'argüello de dezir que, dica que me trobé con Barré en una nuei de carnabal chistabín, teneba claro que no bi eba millor aragonés que lo de ro mío lugar.

8/2/06 8:09 a. m.  
Blogger Fogaire said...

Busatros soz os ereus d'ixe tresoro d'antis mas. No tos lo dixez perder que ye un aragonés majismo, una autentica joya.

Pllanta fuerte nino, un saludo ben gran.

8/2/06 2:04 p. m.  

Publica un comentari a l'entrada

<< Home