dimarts, de gener 31, 2006

Os fillos d'a Tierra

Güe ye un dia d'ixes que cal siñalar en o calandario y acordar-te'n año tras año. Creyeba que mai plegaria o momento que podese dir: -Ya está, ya m'he terminau la saga d'os Fillos d'a Tierra. Pues si siñor, ya l'he leyiu tota, 3904 pachinas a cuala mes intresán repartidas en zinco bolumens.
Si ye buena berdat que o primer libro ye o millor de toz, os atros, anque son a bezes una mica mes lentos, tamé fa asabelo goyo leyer-los. La bida d'Ayla, una ninona Cro-magnon adoptada per un clan Neanderthal, te i tiene enganchau asta la ultima fuella.

Y como tot, ha de tenir de bueno y de dolén:

De bueno en tiene un camatón de cosas, ye una nobela perfectamén documentada, de raso creyible y mui fidel a las teorias preistoricas, pero no tos espantez! no tos pensez que ye un tocho, yo tos aseguro que disfrutarez leyén-la y tos engancharez cosa mala. Descubrirez como bibiban, como sentiban, como pensaban, como cazaban, como moriban y como se relazionaban dos espezies umanas que ban compartir la Tierra fa 30.000 años, cuan o chelo y o fredo dominaban este mundo. Tamé ye intresán descubrir que o razismo, a xenofobia y o desprezio a lo diferén no ye miaja nuebo, fa milenios que l'ome ye igual de buquizo.

De dolén, pues bueno, n'o primer libro no i trobo nada dolén, ta yo ye una obra mayestra. Os atros libros siguiéns si que coixean un poquet, trobo que ñai demasiaus trozos que parlan de sexo, demasiau explizito u descriptibo, que no ye que no m'agrade, sino que a segunda bez que has leyiu como comparten plazers, ya beis que'l feban igual que nusatros, que no t'amostra nada nuebo, que son pachinas totalmén preszindibles y que a ratos asta aburren.

Pos ixo, que tos leigaz "O Clan de L'Onso Cabernario" y dispues ya me contarez, de mientras yo aguardo en candeletas la 6ª entrega d'os libros de J.M. Auel